Usa ka balaang pagsaulog sa Semana Santa ug Malipayong Kasaulogan labina sa Pagkabanhaw sa atong Ginoo mga Igsoon!
Atong saulogon karon ang kinauyokang misteryo sa atong pagtoo ning Semana Santa ang iyang pagpasakit, pagpakamatay ug pagkabanhaw. Kini man ang sangputanan ug kinapungkayan sa iyang pagluwas kanato sugod sa iyang pagkatawo hangtod sa iyang kamatayon sa Krus.
Siya gayod ang Dios sa gugma, kalooy, pasaylo ug kaaghop. Nagmadaugon ang hustisya sa Ginoo batok sa hukom sa tawo. Ang iyang Diosnong kaluoy milagbas sa tawhanong hustisya. Ang iyang gugma nagpahiuli kanatong tanan ngadto sa atong langitnong Amahan.
Sulod na sa 500 ka tuig sa atong pagdawat sa atong pagtoo diin ato kining gipuy-an, diha sa inadlaw adlaw nga pagkinabuhi pagmantala sa Dios sa gugma, kalinaw ug hustisya. Atong pangayoon ang grasya nga mas mainiton pa ug mas makugihon kitang mopakaylap niini sa tanan niini sugod sa atong pamilya.
Atol sa pagsaulog sa kahimayaan, kalipay sa Pasko sa Pagkabanhaw, padayon usab natong iampo ang atong igsoon nga naa pa nakasinati sa kasakitan sa ilang kinabuhi kadtong naapektuhan niining pandemiya, apil usab ang atong kaigsoonang Lumad padayon nga gihasol sa ilang kinabuhi diha sa pagpanalipod niini nga makab-ot ang tiunay nga kalinaw base sa hustisya ug malangkubong kalamboan sa kinabuhi ilabi na usab sa pagpanalipod sa ilang yuta nga kabilin ug yutang nahibilin.
Hinaut unta nga uban kanilang tanan, atong saulogon ang Pasko sa Pagkabanhaw sa Ginoo puno sa kaisog ug gugma ngadto sa tanan.
Kini usab nga panahona, atong buksan ang atong mga gitawag nga Jubilee Doors atol sa pagsaulog sa 500 years of Christianity Jubilee Doors or Jubilee Churches or Pilgrim Churches. Kini ang musunod nga mga Jubilee Churches o Pilgrim Churches sa atong Arkidiyosesis:
St. Augustine Cathedral
Immaculate Conception Church, Jasaan Misamis Oriental
San Nicholas de Tolentino Church, Mambajao, Camiguin
Divine Mercy Shrine, Ulaliman,. El Salvador, Misamis Oriental
St. Francis Xavier Church, Pueblo Upper Carmen, Cagayan de Oro
Our Lady of Lourdes Church, Binuangan, Misamis Oriental
Sta. Rita Church, Balingasag, Misamis Oriental
Sta. Rita Church, Gingoog City
St. Joseph Church, Salay, Misamis Oriental
Eucharistic Shrine of the Sacred Heart, RER, Carmen, Cagayan de Oro
Our Lady of Peace and Good Voyage Church, Lugait, Misamis Oriental
Jesus Nazareno Shrine , Cagayan de Oro
Atong gipahibalo nga ang pagbukas sa pultahah niining Pilgrim Churches nato himoon sa Domingo sa pagkabanhaw gawas lamang sa Divine Mercy Shrine, ang ilang pagbukas sa Jubillee Doors himoon atol sa Kapistahan sa Divine Mercy Sunday.
Atol usab sa kalihokan sa Semana Santa mag-agad usab kini sa lainlaing sitwasyon sa tagsa tagsa ka parokya ug sa ilang pakigsabot sa local government opisyal ug sa Department of Health ug IATF.
Dinhi sa Cathedral, sa Domingo sa Lukay ang pagmendita sa lukay himoon 15 minutos sa dili pa magsugod ang matag Misa. Kini himoon sa Cathedral. Ang buot ipasabot niini atol sa entrance prosesyon padulong sa altar, himoon nianang higayona ang pagpamendita sa lukay.
Sa Lunes hangtod sa Biernes Santo padayon ang Via Crucis o Estasyon sa Krus matag alas 5:00 sa buntag sa dili pa ang alas 6:00 nga misa.
Sa Martes Santo, sa alas 5:30 sa hapon himoon ang Misa Krisma. Niining higayona ang atong mga kaparian magbag-o sa ilang panaad isip pari ngadto sa Obispo ug labaw sa tanan ngadto sa atong Ginoo ug ug mao usab ang pagkonsagrar sa mga lana.
Sa Huwebes Santo sa buntag alas 6:00 himoon ang morning prayer ug sulod sa morning prayer himoon ang Rito sa commissioning sa bag-ong laygong ministro ug rite of commissioning sa daang laygong ministro nga magbag-o sa ilang panaad.
Sa Huwebes Santo himoon ang Misa sa katapusag panihapon o Last Supper sa alas 5:30 sa hapon. Ang Santisimo Sakramento ilibot sa syudad human sa Misa. Walay repositoryo ug pagtukaw atubangan niini sa panahon sa pandemiya.
Sa Biernes Santo ang Unang Novena sa Diosnong Kalooy himoon sa alas 2:00 sa hapon, sundan dayon kini sa liturhiya sa alas 3:00 ug sundan sa veneration sa cross ug wala nay prusisyon sa sepulcro human sa kalihokan.
Sa Sabado Santo ang Bihilya sa Pagkabanhaw himoon sa alas 6:00 sa hapon. Walay pamunyag nga himoon niini kay ang pagbunyag himoon sa Abril 14, kay ang abril 14 mao ang paghandom sa unang pagbunyag sa Abril sa 14,1521.
Tanang bunyag sa tanang parokya himoon sa Abril 14 karong tuiga agig paghandom sa unang bunyag nga nahitabo sa Abril 14, 1521.
Ang Rito sa Pagsugat pagahimoom human sa Misa sa Sabado Santo diha ra pod sa sulod. Ang Domingo sa Pagkabanhaw mao usab ang pag-abli ug pagbukas sa mga Jubilee Doors ug niadtong Jubilee Churches o Pilgrim Churches.
Sa katapusan atong pahimangko nga magasunod sa mga health protocols aron malikayan ang pagkaylap sa mga covid virus.
Mang hinaut kita nga ang pagsaulog sa balaan nga Semana Santa ug Pagkabanhaw sa atong Ginoo dili ang covid ang mapakaylap kondili ang way sukod nga gugma sa atong Ginoo.
Malipayong Pasko sa Pagkabanhaw kaninyong tanan!
